Gunearen irekiera ofizialean eskolako ume eta gaztetxoak izan dira protagonista "beraiek izango direlako gune horretaz gehien disfrutatuko dutenak", Oxel Erostarbe Elgetako alkatearen esanetan.
Inaugurazioan bost eta seigarren mailako gazteek prestatutako bi bertso abestu dituzte lehenengo, eta ondoren, agurra dantzatu dute. Horren ostean egin dute zinta mozketa, eta gela bakoitzarentzako zintaren zati bat gorde dute. Bertaratu diren guraso eta aiton-amonek txalo zaparrada batekin eman die amaiera ekitaldiari.
Erabilera ugariko gunea
Sara Ugarteburu seigarren mailako ikasle batek esan digu pozik zeudela: "Oso pozik gaude, izan ere, jolasteko leku gehiago daukagu orain".
Erostarbe alkateak gaineratu du Udalak eskolarekin zeukan zor bat bete dutela lan horiekin: "Inbertsio handia suposatu duen arren eta denbora batean itxita eduki dugun arren, nik uste dut guztiondako pozteko eguna dela gaurkoa". Adierazi du baita ere, eskolako orduetatik kanpo ere, herritarrek erabilera ugaritarako gune bat errekuperatu dutela lanen ostean.
Auzotar batzuk, bestalde, kexu ziren oraindik Telefonica-ko kableak ondo jarri barik daudelako eta tuberia batzuk konpontzeke daudelako.