Pentsioak ukitzen dituenak ez dauka nire botoa lelopean 70 bat lagunek 15 minutuko elkarretaratzea egin dute gaur iluntzean herriko plazan. Xalbadorpe erretiratuen elkarteak bat egin du Gipuzkoako Erretiratu eta Pentsiodunen Elkarteak proposatutako mobilizazioarekin, eta Espainiako Gobernuak iragarri duen pentsio-sistemaren erreformaren aurka agertu dira.
Elgetako elkarretaratzeko pankartaren atzean agertu diren herritar gehienak erretiratuak dira, baina bazen tartean bestelakorik ere. Udal ordezkari politikoak ere bertan izan dira, hala nola Oxel Erostarbe alkatea, Bilduko bozeramaile Janire Lazkano edo EAJko bozeramaile Patxi Basauri. "Pentsioen auzia ez da erretiratuon arazoa soilik, gizarte osoarena da", adierazi du Xalbadorpe elkarteko ordezkari batek. "Gazteek ere parte hartu beharko lukete horrelako mobilizazioetan".