Elgeta moduko herri txiki batendako zerbitzu handia da urteotan Eko D dendak eman diena, besteak beste, ogia saltzen zuelako, eta gainera, astelehenetik domekara artean zabalik zegoelako.
Saltokiaren jabeak, baina, Dayami Barok ezin izan dio Erdiko Dendari luzaroagoan eutsi. Arrazoi nagusia da berarekin lanean zebilen langilea joan ostean berak bakarrik ezin izan diela dituen bestelako zereginei aurre egin.
Ezin eskualdatu
Saltokia ixteko erabakia hartu ostean, hala ere, ahalegindu zen denda eskualdatzen, beste norbaitek har zezan; baina ez du dendarekin jarraitu gura duenik lortu, seguru aski, krisiaren eraginez; eta dendaren ateak ixtea beste erremediorik ez du izan. Pena handiarekin aurkitu genuen atzo, astelehena, laneguna izan zuen azkeneko egunean. Ateak behin betiko itxi ostean etxera negar egitera joango zela adierazi zigun.
Dirua galdu
2008ko abenduan zabaldu zituen ateak Erdiko Dendak. Dayami Barok berak txukundu zuen lokala bere poltsikotik. Eta zoritxarrez, ez du lortu lokal horretan inbertitutako dirua berreskuratzerik. Hala ere, ez da damutzen denda zabaldu izanaz, eta espero du elgetarrak eurak ere gustura geratu izana berak emandako zerbitzuarekin.
Jatorri kubatarra du Barok, baina zeharo elgetartu dela esan daiteke, 17 urte daramatza-eta bertan bizitzen. Erdiko Dendan, adibidez, uztartuta zituen Kubako bandera eta gure Ikurrina, denon bistara. Orain, geldialditxoa egingo du, egoera berrira egokitu arte. Baina seguru laster ikusiko dugula Dayami Baro bestelako zereginetan, ez dirudi-eta geldi egotekoa denik.