Haurrak ur-putzuetan, eta helduak Bolatokiko tabernako arduradunak eskainitako itzalkinen azpian... horrela joan dira azken egunak kiroldegiko kantxan. Eguraldi ona egin du eta ur-putzuek harrera ona izan dute honakoan ere. Gehienbat astelehenean, bits festa ere egin zen egunean.
Bits festa, kiroldegian
Bitsak hartu zuen kiroldegiko kantxa astelehen arratsaldean. Laster gertatu zuen kanoia Atracciones Sanz enpresako arduradunak, eta hamar minutuan aparra zerion neska-mutikoen gozamenerako. Bits festa ere kiroldegiko kantxan egin dute aurten, eta ez da kokapen txarra. Ur-putzuak bertan egotea, ordea, tentazio handiegia zen eta neska-mutikoek bertara egiten zuten salto aparrez gainezka zegoen gorputza garbitzeko.
Aurtengo ur-putzuak joan dira. Bukatu da 2013ko Elgeta Beach!