%2009.52.14.jpg)
Eguenean, ekainak 27, hasi zituzten jaiak Elgetan eta atzo, domeka, eman zieten amaiera. Aurtengoan gainera, izan da berrikuntzarik. Izan ere, zapatuan estreinakoz Elgetako haur eta gaztetxoek euskal dantzak egin zituzten Herriko Plazan. Udaberrian hasi zuten euskal dantzen ikastaroan parte hartutako gaztetxoek dantzatu zuten, eta guraso, familiarteko eta herritar ugari izan ziren dantzak ikusten. Euren saioa hasteko, gainera,
aurreskua dantzatu zieten aurreko urteko jaietatik aurtengoetara herrian jaio diren umeei. Jaioberriei udaletxean egindako ongi etorriaren ondoren izan zen hori. Zapatuko paella janean ia 600 lagun batu ziren, "inoiz baino gehiago", Oxel Erostarbe alkatearen esanetan. Eta jende asko erakarri zuen beste ekitaldi bat izan zen barikuko Vendetta taldearen kontzertua; inguruko herrietako jendea bertaratu zen Elgetara hori ikustera. Urtero egiten den asto karreran, berriz, aurten lau parte-hartzaile izan ziren eta hiruk bukatu zuten lasterketa; Mikel Beretxinaga izan zen irabazlea, azken urteetan bezala. Atzo, domeka, egin zen Ferixa Nagusixa eta herritarrek ganaduak eta artisauen postuak ikusi zituzten, besteak beste.
Balorazio positiboa
Oxel Erostarbe alkateak jaien balorazio positiboa egin du: "Ondo joan dira jaiak, oso parte-hartzaileak izan dira, eguraldiak ere lagundu du eta ekintza guztiak oso ondo irten dira", esan du.