"Badatoz kalian gora kalian behera ibiltzeko egunak eta gabak", irakur daiteke jaietako agurrean. Eta horrela da. Jai batzordeak lau eguneko egitaraua prestatu du.
Programak antzekotasun handiak ditu aurreko urtekoarekin alderatuta. Berezitasun handiena, aurten, plazako musika taldeekin egindako ahalegin berezia da. Barikuan, esaterako, Vendetta taldea izango da Elgetan. Eta azken orduko aldaketen artean umeen eguneko bazkaria aipatu behar da. Guraso boluntarioak falta ziren bazkari hori banatzeko, baina azkenean badaude, eta txartelak sei eurotan daude salgai Julianen kioskoan. Salbador kaleko lokal batean, berriz, taberna zabalduko du herriko gazte talde batek. Kontzertua ere antolatu dute.
Jaietako argazki lehiaketa
Aurten ere Ferixa Nagusiko argazki lehiaketa antolatu du Udalak. Hala, jaietan argazki onena ateratzen duen elgetarrari tableta digital bat emango diote opari.
Argazkiak jaietako edozein egunetan atera daitezke, eta gaia librea da. Lanak aurkezteko epea uztailaren 2an, 13:00etan, amaituko da.
Argazkiak ondorengo helbide elektronikora bidali behar dira: danonartian@elgeta.org.