Gero eta gertuago daude udako oporrak, eta Elgetako Udalak udaleku irekiak iragarri ditu uztailerako. Iaz, bost dinamizatzaileren gidaritzapean 54 neska-mutikok erabili zuten zerbitzua.
Izenematea zabalik
Hiru aste eta erdiz emango du aurten zerbitzua Udalak; uztailaren 1etik 24ra bitartean, eta ohiko ordutegiarekin: astelehenetik barikura bitartean, 09:00etatik 13:00etara. Haur Hezkuntzako zein Lehen Hezkuntzako neska-mutikoendako dira udaleku irekiak; hau da 2002tik 2011ra bitartean jaiotakoendako, biak barne.
Zerbitzuaren prezioari dagokionean hile osoko kuota 90 euro da; hiru asteko kuota 70 euro; bi asteko kuota 55 euro; eta astebeteko kuota 30 euro. Bigarren anai-arrebak %20ko deskontua izango du. Hobari bereziak jasotzeko udaletxean galdetu behar da. Izena emateko prozedura da banketxean ordainketa egitea, eta froga-agiria udaletxeko harreran aurkeztea.