Orain arteko markak apurtu ditu Elgetako frontenis txapelketak. Aurten, 20 bikote ariko dira nor baino nor pilotalekuko kantxan: gizonezkoen txapelketan hamabi bikote, eta bikote mistoen txapelketan zortzi. Guztira, iaz baino zortzi bikote gehiago. Asier Osora da antolatzaile nagusia, eta pozik agertu da jasotako erantzunarekin: "Kanpoko hiru bikote ere apuntatu dira, baina erabaki dugu txapelketa herritarrendako egitea", esan du. Hala, izenematea ordaindu eta jokatzerik izango ez duten bikoteei jakinarazten zaie Espaloia kafe antzokian itzuliko zaiela ordaindutakoa.
Emakumezkoen txapelketarako, berriz, bikote bakarra aurkeztu da. Hala, antolatzaileek txapelketa hori ez egitea erabaki dute, eta bikote horri ere dirua itzuliko diote.
Hasiera maiatzaren 10ean
Lehenengo norgehiagokak hurrengo barikuan, hilaren 10ean, hasiko dira. Bariku iluntzeetan eta zapatu arratsaldeetan jokatuko dira partiduak. "Ligaxkan soilik 94 partidu jokatuko dira", esan du Osorok. "Gizonezkoen txapelketako 66 partidu eta txapelketa mistoko 28". Finalerdiak eta finalak urrun daude oraingoz. Egutegia egitea da orain premiazkoa.