Martitzenean, Liburuaren Egunean, herriko plazara atera zituen liburuak Geaxi Ezpeleta udal liburuzainak. Liburutegira ekarritako azken nobedadeak erakutsi zituen plazan baita herritarren artean hainbat liburu banatu ere. Eguraldia lagun izan zuen Ezpeletak, eta adin guztietako elgetarrak hurbildu zitzaizkion udaletxeko arkupean ipinitako mahaira.
Ipuin saioa zapatuan
Zapaturako Saioa Bikandi ipuin kontalariaren saioa iragarri du udal liburuzainak. 3-8 urte arteko umeendako saioa da. Ekintzan, hori bai, arduradun batekin hartu behar dute parte haurrek. Ideia da gurasoek eta umeek saioaz elkarrekin gozatzea. Horregatik, garrantzitsua da aldez aurretik izena ematea. Interesatuek udal liburutegian edo udaletxean eman dezakete izena. Ondorengo helbide elektronikoan ere bai: elgetakoliburutegia@elgeta.net.
Gurasoen txokoa
Liburutegian berria den Gurasoen txokoa aurkezteko ere baliatu du Liburuaren Eguna Ezpeletak. Gurasoendako interesgarriak izan daitezkeen argitalpenak elkartu ditu liburuzainak txoko horretan. Haur eta gazteen hezkuntzarekin erlazionatutako dokumentazioa aurki daiteke bertan ikuspuntu, esperientzia eta gomendio sorta handiarekin. Tartean da Arrasateko eta Aretxabaletako liburutegien eta Txatxilipurdi elkartearen artean argitaratu duten Gurasoentzako baliabide gida. Dokumentua kontsultagai duzue udal liburutegian.