Jaien batzordea laster hasiko da lanean, eta Udaletik proposamen berria egin dute. Ideia da umeendako euskal dantzen ikastaroa antolatzea, eta ikasitakoa jaietako Herri Egunean erakustea. Ikastaroa Eibarren euskal dantzak erakusten dituen Irati Kortabitartek gidatuko luke, eta eguaztenetan egingo litzake kiroldegiko gimnasioan, 18:15ean hasita.
Izena emateko epea apirilaren 8ra arte dago zabalik udaletxean zein liburutegian, eta prezioa 12 euro da. Ekimena 2001 eta 2008 urteen artean jaiotako neska-mutikoendako da.
Herritarren ekarpenak
Udaletik, bestalde, herritarren iritzia jaso nahi dute aurreko urtetik hona jaietako egitarauan zer ipini, kendu, aldatu edo hobetu behar den jakiteko. Ekarpenak udaletxean zein danonartian@elgeta.net helbide elektronikoan jasoko dituzte. Herriko elkarteei eta eragileei ere eskaera berdina luzatu zaie.