Helduendako futbito txapelketa azkarra egitea zen hasierako asmoa; pare bat aste bukaeratan jokatzea, alegia. Erantzuna, ordea, ustekabea izan zen: gizonezkoen txapelketan zazpi taldek dihardute (76 lagun), eta emakumezkoenean lauk (38 lagun). Azkenean, beraz, ligaxka, finalerdiak eta finala jokatuko dira.
Hori bakarrik ez: umeek ere futbitoan egin gura dute, eta laster batean antolatuko dituzte taldeak, guraso arduradun eta guzti. Hala, aste honetako albistea da neska-mutikoen arteko partiduak ere jokatuko direla. Sei talde osatu dituzte (47 lagun), eta Udalaren laguntzarekin eta gurasoen ardurapean bina partidu jokatuko dituzte. Taldeak dira Karramarroak (11 neska-mutiko), Txapeldunak (7 mutil), Superneskak (7 neska), Kontuz neskak (7 neska), Xelebreak (9 mutil), eta Lamoskagau (6 neska-mutiko).
Lehenengo partidua hurrengo barikuan, martxoak 1, jokatuko dute, eta bigarrena nagusien txapelketako finalen aurretik.