Urtero moduan abenduaren 31an jokatu dira, aurten ere, herri mailako pilota txapelketako finalak. Haurren finalak jokatu ziren lehenengo, eta 11:30ean hasita, helduen txapelketakoak.
40 urtetik beherakoen finalak ordu eta erdiko iraupena izan zuen, eta Odei Zenitagoia eta Antoni Elortza izan ziren garaileak. 18 tantoan utzi zituzten Ibon Untzetabarrenetxea eta Mikel Beretxinaga.
40 urtetik gorakoen finalean, berriz, Enrike Elkoro eta Igor Irazabal nagusitu ziren. Atzetik joan ziren 10. tantoan berdintzea lortu zuten arte. Beste bost tanto egin zituen bikote arerioak, Angel Ibarluzeak eta Alberto Telleriak 22-15 amaitu zen-eta finala.
Balorazio positiboa
Gustura dira txapelketako antolatzaileak. "17 bikote izan dira aurten txapelketan, eta nire ustez kopuru polita da Elgeta moduko herri batean", esan du Fernando Zenitagoiak. Orain, futbitoak hartuko du erreleboa frontoian. Txapelketa bizkorra antolatu gura du Udalak. Hurrengo bilera urtarrilaren 4an da, 19:00etan, udaletxean.