Patagoniako lasterketa K42 serieen barruan final handia izango da, urtean zehar, besteak beste, Kanarietan, Frantzian, Brasilen, Txilen eta Perun korritu ostean –munduko bost kontinenteetatik lauk dute K42 serieko lasterketa bat. Hala, antolatzaileek baieztatu dute mundu mailako puntako atletak batuko direla Villa La Angosturan.
Kortazarrekin batera lasterketan izango dira Kasie Enman (AEB), Anna Frost (Zeelanda Berria), Rickey Gates (AEB), Miguel Heras (Espainia) eta Zhanna Vokueva (Errusia) puntako atletak, baina guztiek ere ondo dakite Argentinan etxeko atletak direla faborito: lasterketako bost edizio irabazi dituen Gustavo Reyes eta 2009 eta 2011ko edizioak irabazi zituen Cristian Mohamed, hain zuzen ere.
Kilian eta Marlen, bakarrak
Esan bezala, sailkapen historikoak erakusten du txapela etxean geratu izan dela, ia beti. 2010ean Kilian Jornet (3:08:31) bilakatu zen lasterketa irabazten zuen lehen kanpotarra –eta errekorraren jabe–, eta iaz, emakumezkotan, Txileko Marlene Flores gailendu zen (4:11:11). Ikusteko dago lasterketaren hamargarren edizioan nork ematen duen ezustekoa. Zapatuko lasterketak 42 kilometro izango ditu, eta 4.380 metroko desnibel metatua. Hala, korrikalariek Cerro Bayo (1.782 metro) mendian aurkituko dituzte malda gogorrenak, hain zuzen, lasterketako 23. kilometrotik 28. kilometrora arte.