Jose Gardoki soinujole aramaiorra Elgetan izan zen martitzenean. Dozena bat lagun zituen zain kultura etxeko musika gelan, tartean abesbatzako zuzendari Jose Antonio Retolaza, eta musika irakasle Lorea Larrañaga.
Elgetarrek 18 bat kantuko errepertorioa aurkeztu zioten, eta laster hasi zen lanean soinujolea. Asmoa da urriko azken domekako poteoan herria kantuan ipintzea. "Aukeratu ditugun kantu gehienak oso ezagunak dira", adierazi du Jose Antonio Retolazak. "Akaso, egongo dira pare bat jendeak hainbeste ezagutzen ez dituenak, baina ez dut uste inork arazorik izango duenik".
Parte-hartzeko deia
Kantu zale guztiak daude kantuan egitera deituak; haur zein heldu, elgetar zein kanpotar. Hurrengo entsegua hilaren 23an, martitzena, egingo dute, 21:00etan. Haur eta gurasoendako ere antolatu dituzte entsegu bereziak, izan ere, helburua da kantu zaharrak ahotik ahora pasatzea.