Pozik daude antolatzaileak Elgeta ezagutzen izeneko ekimenaren lehenengo irteerak erakarri duen jende kopuruarekin. Dani Gillegiren gidaritzapean herriko zuhaitzik garaienak ikustera joateko proposamenak erantzun oso ona izan zuen, eta 50 bat lagunek egin zuten atzo, domeka, Egoarbitzarako buelta.
Sekuoiak eta haginak ikusten izan ziren eta Udalak beste hiru irteera iragarri ditu datozen hilabeteetarako. Herriko karobiak, mugarriak eta artelanak ezagutzeko aukera emango dute urrian, azaroan eta abenduan egingo diren txangoetan.