Amaitu dira udako oporrak Elgetako eskola-umeendako ere. Gaur zabaldu ditu ateak ikastetxeak eta 2012-2013 ikasturtea hasitzat eman dezakegu gurean ere. Egun seinalatua izaki eta bere anekdota ere eman du; eskolen hasiera adierazten duen txirrinak ez du jo gaur goizean.
101 eskola-ume
2012-2013 ikasturte hasiera honetan 101 ikasle hartu ditu Elgetako herri eskolan. Ikastetxeak zazpi unitate izango ditu; lau Haur Hezkuntzan, eta Lehen Hezkuntzan hiru —ziklo bakoitzeko gela bat—. Irakasleak, berriz, iaz baino 1,5 gutxiago ariko dira.
Aste honetako bi eskola egunak bereziak izango dira. Jardunaldi trinkoa egingo dute; 09:00etatik 12:30era haur hezkuntzako haurrek, eta 09:00etatik 13:00era lehen hezkuntzakoek. Jantokiko haurrak 14:00etan irtengo dira.
Haurreskola
Haurreskolan ere gaur hasi dute ikasturtea. Ikasturte hasiera honetan erabiltzaileak zazpi dira, eta lehenengo asteotan egokitzapena egin beharko dute. Hezitzaileak, berriz, bi izango dira; bat jardunaldi osoarekin, eta bigarrena jardunaldia erdiarekin.