Aintzane Ezenarrok, Mikel Basabek eta Oxel Erostarbek atzo aurkeztu zituzten legebiltzarkide karguari uko egiteko idatziak. Udako etenaldiaren aurretik atzo batzen zen azken aldiz Gasteizko Legebiltzarreko Mahaia, eta saio horretan erregistratu zuten Aralar alderditik aurkeztutako hiru ordezkarien akta itzulketak.
Aralar alderdiak apirilaren 4an eskatu zien Ezenarrori, Basaberi eta Erostarberi legebiltzarkide aktak itzultzeko, baina hiru ordezkariek erantzun zuten zeregin ezberdinak zituztela esku artean eta karguan jarraituko zutela bilkura saioak amaitu arte, eta ekainaren 30eko data eman zuten. Bilkura saioak uztail amaierara arte luzatu izanak ekarri du hiru legebiltzarkide aktak hilabete beranduago entregatu izana.