Astelehenean egin zuten aurtengo Ferixa Nagusiaren inguruko balorazioa Baserritarren batzordean. Bertan emandako datuen arabera uztailaren 1eko azokan 34 saltzaile, 26 artisau, makinaria postu bat, eta 85 abelburu egon ziren. Abereak izan ziren 24 idi pare, 22 behi, lau txakur kume, hiru asto, hiru txahal, bi behor, bi moxal eta idisko bat.
Nortasun propioa eman
Baserritarren batzordean irtendako ideietako bat izan zen etorkizunera begira garrantzitsua dela Elgetako ferixa nortasun propioz janztea. Lehenengo pausoa litzateke ferixaren helburuak finkatzea eta zenbait erabaki hartzea; artisau kopurua mugatzea eta saltzaileei preferentzia ematea, ferixara etorriko den abereen mota klasifikatzea eta ferixari nortasuna emango diona aukeratu: idiak, ganadu arraza baten aldeko apustua egin...
Batzordean gaia lantzen jarraitzeko konpromisoa hartu dute, eta baserritarren iritziak eta ekarpenak jasotzea dute helburu.
Antolakuntza lanak
Gainerakoan batzordean aipatu zen ferixa muntatzeko antolaketa "nahiko ondo eta azkar" joan zela, eta postu bakoitzak bere mahaia ekartzeak lana erraztu egiten duela. Hala, aurrerantzean bide horretatik jarraitzea erabaki zuten.
Hobetzeko neurrien artean ferixa orduetan ere zirkulazio mozketa egiteko aukera aipatu zuten batzordean. Neurri hori beharrezkoa ikusten dute postu batzuk errepide ertzean egoteak sortzen dituen arrisku egoerak saihesteko.
Ferixa amaitu osteko garbiketa lanak ere aipatu zituzten asteleheneko batzarrean. Komeniko litzateke enpresa garbitzailearen lanaz aparte postu bakoitzak bere hondakinak kudeatzea.