Miraballes baserriaren ondoan karobi bat agertu da. Jakinekoa zen bertan zegoela, baina sasi artean ezkutatuta zegoen. Udalak, orain, ingurua txukundu eta informazio panela ipini du bertan nahi duen orok bisita dezan.
Karobi frantsesa
Karobia nahiko egoera onean dago, eta berezia da inguruko gainerakoekin alderatuta. Ez da karobi arkuduna; karobi frantsesa da. Hau da, kare harria edo karatxa egurrarekin tartekatuta erretzen zuten. Behin erreta, ura gehitzen zitzaion kareharriari eta karobitik gertu mantentzen da gaur oraindik ere iturria. Gaur egun apenas darabilgun arren kareak erabilpen asko zituen: lurra ondu eta harrak hiltzeko, ikuiluak desinfektatzeko, baserriak zuriz margotzeko, edo arrautzak kontserbatzeko.
Miraballeseko karobiak bertan ditu oraindik hainbat lanabes eta baita bedeinkatzeko gurutzea ere. 1941ko data darama gurutzeak, itxura guztiaren arabera karobiaren eraikuntza baino beranduagokoa da.