Aralarreko berme-batzordeak alderdiaren estatutuek jasotzen duten zigor gorena ezarri gura die Aintzane Ezenarro, Mikel Basabe eta Elgetako Oxel Erostarbe parlamentariei: Aralarretik kanporatzea. El Pais-ek dioenez, alderdiko militante eta kide izateari uztea proposatzen du, egindako arau-urratzearengatik; diziplinazko espedientearen bideratzaileak "oso larritzat" jo du egindako arau-haustea, egunkari horren arabera.
El Pais-en arabera, berme-batzordeak idatzizko jakinarazpena bidali die hiru parlamentariei, esanez zuzendaritzatik esandakoaren kontra Legebiltzarreko bake ponentzia babestu izanak eta, ostean, karguak alderdiaren eskuetan uzteari uko egin izanak zigor maximoa merezi dutela: Aralarretik botatzea.
Zuzendaritzak izango du azken hitza
Egunkari horren arabera, Ezenarro, Basabe eta Erostarbek apirilaren 13an jaso zuten jakinarazpen ofiziala eta 15 eguneko epea dute errekurtsoa aurkezteko. Alderdiko zuzendaritzak izango du azken hitza; berme-batzordearen proposamena aintzat hartzen badu, Ezenarro, Basabe eta Erostarbe alderditik kanporatuak izango dira, baina Legebiltzarreko aulkiak mantendu ahalko dituzte talde propioa osatuz legegintzaldia agortu arte. Oxel Erostarberen kasuan, parlamentaria ez ezik Elgetako alkatea ere bada.
Erostarbek ez du adierazpenik egin nahi izan ezta zuzendaritzak ere. Azken honetatik adierazi digutenez, eurek eskatuta abiarazi zuen berme-batzordeak ekinbide hau –barne-araudia edo estatuturen bat urratu zuten ikertzeko– baina berme-batzordea organo independentea da eta zuzendaritzak ez du zertan ezagutu gaur El Pais-ek publiko egin duen dokumentua.