Musika beltza abeslari zuriek interpretatuta. Horixe da Esne Beltzak egiten duena. Euskaraz, gainera. Nahiz eta abesti eta estrofa batzuk gaztelaniaz, ingelesez eta portugesez ere abesten dituzten. Solano bera bezala, Fermin Muguruzarekin batera aritutakoak dira Esne Beltza taldeko kide asko. Kontrabanda taldeko musikariak ere badaude.
Estilo askotakoa
Reggae, ska eta hip-hop, funky, soul, pop…, denetik jorratzen dute, estilo nahaste bat da, trikitiarekin lagunduta.
2008an atera zuten lehenengo diskoa, Made in Euskal Herria izenekoa. 2009an, hainbat taldekidek, Xabi Solano buru, CD+DVD bat grabatu zuten Esne Zopak-Esnesaltzailearena tituluarekin. Diskoa trikitiaren munduari eskainia zegoen eta estilo honetako abestiz osatua. DVDan hainbat trikitilariri egindako elkarrizketak agertzen ziren. 2010ean taldeak bigarren diskoa atera zuen, Noa izenekoa, eta orain arte arrakasta handiena lortu duena.