Laster dugu hemen abuztua, eta horrekin batera ordutegi eta zeregin berriak gehienondako. Gipuzkoako Mendi Federaziotik adierazi digute Intxortako ibilbide tematikoan egitekoak ziren seinalizazio lanak amaitzear daudela. Gezi formako seinaleak ipini dituzte eta leku esanguratsuenetara nola iritsi adierazten dute, baita zein koloretako seinaleak jarraitu behar diren eta ze distantziara dauden ere.
Bisita gidatuak, hiru
Ibilbidea gidari baten azalpenak entzunez egin nahi izanez gero, jakin oporrotan hiru bisita gidatu egingo dituztela; uztailaren 31n eta abuztuaren 7an zein 28an, guztiak domekarekin. Ibilbidea kafe antzokitik abiatuko da 10:00etan eta hiru bat orduko iraupena du. Lehendabizi Interpretazio Gunea bisitatzen da, eta ondoren bost kilometroko ibilbide tematikoa oinez egiten da. Ezinbestekoa da aurrez izena ematea — 943 718 911 edo 943 796 463 —. Prezioa da bi euro 6-16 urte bitartekoendako eta bost euro 16 urtetik gorakoendako.