Elgetako udal ordezkariekin batera, eszenatokian izan zen atzo Oihana Kortazar mendi lasterkaria ere, Ferixa Nagusiko jaiei hasiera emateko ekitaldian.
Egindako ibilbideagatik eta lortutako emaitzengatik, omenaldia egin zion Elgetako Udalak. Lore sorta jaso zuen alkatearen eskutik, arkua irudikatzen duen oroigarria alkate txikiaren eskutik, eta Intxortako Lehoiak Athletic-eko lagunarteko ordezkariek ere eman zioten sari bat, etxea trofeoz beteta eduki duela baina eurek emandako horri ere toki txiki bat egiteko eskatuz.
Aurreskua dantzatu zioten hurrena. Esker hitzak izan zituen Kortazarrek, trukean: eskerrak eman zizkien bertan batutakoei, berarekin akordatzeagatik; eta eskerrak baita ere etxekoei entrenatzeko denbora izaten laguntzearren, eta lagunei babesa ematearren.