Intxortako Lehoiak lagunartekoaren ekimenez etorriko dira. Izan ere, martxoaren 23an egin zuen aurkezpena jendaurrean Elgetako lagunarteak. Aurkezpen ekitaldia eta afaria egin zuten zuri-gorri zale elgetarrekin eta beste herri batzuetatik etorritako lagunarteekin batera. Ordurako, Elgetan izango zirela agindu zuten jokalari eta zuzendaritzako kide zuri-gorriek, baina azkenean ez ziren agertu. Huts egin zien Atlhetic-ek elgetarrei.
Dolua Athleticen
Izan ere, Txutxi Aranguren jokalari eta entrenatzaile zuri-gorria izandakoa hil zen aurreko egunetan eta hileta elizkizunetara joan behar izan zuten Athletic-ekoek. Horretaz gain, Athletic-ek adiskidantzako partidua jokatu zuen egun berean Alavesen aurka eta Llorente, Iraola eta Martinez Espainiarekin konbokatuta zeuden.
Arrazoi bategatik ala besteagatik, martxoaren 23ko hartan ez zen jokalari zuri-gorririk izan Elgetan. Athletic-eko historiko bat, Karmelo Zedrun, bai izan zen eta, harekin batera, Athletic-en kanpo harremanetarako arduradun Javier Utxa ere bai. Klubeko bi ordezkari bakarrak izan ziren haiek.
Berba bete
Utxak onartu egin zuen zale elgetarren aurrean egindako hutsegitea eta beste batean jokalari zuri-gorriak Elgetara etortzeko konpromisoa hartu zuen.
Berba bete eta gaur Elgetan izango dira, hortaz, Athletic-eko jokalariak. Ez nolanahikoak, gainera, baizik eta goi-goi mailakoak, taldeko jokalari onenak, alegia: Llorente eta Martinez internazionalak, eta Muniain.