Oxel Erostarbe alkateak bilera eskatu du Repsol enpresako arduradunekin eta bilera horretan herritarren ezinegona zenbaterainokoa den azaldu nahi die.
Azken hilabetean gas propanoaren prezioak nabarmen egin du gora eta etxe gehienetan min handia egin du martxoko fakturak. Egoera horren aurrean, Udalak herritarren kexak jasotzeko epea zabaldu zuen. "Honezkero 50 idatzitik gora jaso ditugu", azaldu dute Udaletik. "Herritarrek bete behar duten inprimakia prest dugu eta idatziak jasotzen jarraituko dugu Repsoleko arduradunekin bilera hori egin bitartean".
Fakturak aurkezteko eskaera
Udalak prestatu dituen inprimakietan datu pertsonalak eman behar dituzte herritarrek eta udal arduradunek eskatzen dute idatziarekin batera fakturak ere aurkezteko; "Epe bereko fakturak konparazioa egin ahal izateko", adierazi dute. Inprimakia Elgeta.org udal webgunean ere izango duzue.