Barikuan banatu zituzten Debagoieneko III. Kirol Sariak Aramaion eta Emilio Mandaluniz izan zen sarituetako bat. Elgetako Txirrindularitza Elkarteko presidentea izan da urteetan eta lan handia egin du 25 urtean Elgetako Mendi Kriteriuma antolatzen zein Elgeta lasterketa garrantzitsuen helmuga izan den bakoitzean.
Elgetako Udalaren saria jaso du Emilio Mandalunizek Oxel Erostarbe alkatearen eskutik. "Nik jasotzen dut, baina sari hau bidegurutzetan egon diren guztiendako da", esan zuen sarituak. Elgetako Mendi Kriteriumaren inguruan esan zuen aurten jokatu ez izan arren saiatuko direla atzera ere taldetxoa antolatzen eta aurrera eramaten. "Guk 25 urtean antolatu dugu eta erreleboa behar dugu. Saiatuko gara talde berria egiten eta, noski, prest gaude lehenengo urteetan gure laguntza eskaintzeko".