larraitz zeberio | elgeta
Oxel Erostarbe alkatea gustura azaldu da inkestak emandako emaitzekin. "Herritarren gogobetetze maila orokorra altua da; 7,56ko nota ipini dute", adierazi du. Puntuazio altuenak jaso dituzten ekintzen artean alkateak nabarmendu ditu Asentzion egindako lanak (7,70), haurreskola, ludoteka eta gazteleku zerbitzuak (7,54), ibilaldi tematikoa (7,43), berdeguneak (7,37), eta herriko kaleetan lehentasuna oinezkoei eman izana (7,16). Azpimarratu du kirol instalazioek jaso dutela notarik bajuena (6,54).
Behar nagusiak
"Inkestak balio izan du behar nagusi batzuk identifikatzeko", azaldu du Erostarbek. "Zentzu horretan, garraio publikoa zein osasun zerbitzuak hobetzea dira bi eskaera garrantzitsuenak".
Alkateari, bestalde, kontuan hartzekoa iruditzen zaio herritarrek saihesbidearen bigarren fasea egitearen alde agertu izana, baita defizitarioak izan arren haurreskola, eguneko zentroa, erretiratuen egoitza eta kultura etxea mantentzea eskatu izana. Igerileku bat egiteko aukeraren aurrean parekotasun handia dago. Kostu handiko proiektua dela jakinarazita igerilekua egitearen aurka azaldu da %44,9, eta alde, berriz, %42,7. Diputazioak Aixolako zentroa zabaldu izana, berriz, herrian ez dela igartzen adierazi du gehiengoak.
Emaitza guztiak zein politikariei herritarrek ipinitako notak elgeta.org webgunean daude.