"Lapurrek eraikinaren lau metroak igo eta teilatuan ezkutatuta geneukan alarma desaktibatu dute. Nahiz eta Elgetako segurtasun sistema hoberena izan, nahi dutena egin eta lapurtu dute, oso azkarra izan da dena", azaldu digute Bolatokikoek. "Guztia eraman digute, musika ekipo osoa, bozgorailuak, ordenagailua, proiektoreak, geneukan guztia", gaineratu dute. Guztira, 12.000 euroko balioa zuten lapurtutako gauzek; dirurik baina, ez dute lapurtu, makinetakoa bakarrik. Lau urtetan sei aldiz egin dietela lapurreta ere esan digute. Bolatoki tabernakoek salaketa jarri dute eta orain Ertzaintza ikerketa egiten dabil. "Taberna zabalik daukagu, lanean jarraitu behar dugu-eta", gaineratu dute.
Eraikinak berak ere izan ditu kalteak: sabaiko igeltsua, leihoak, burdinazko hesiak... eraikina udalarena izanda, berau egin beharko da kargu. Oxel Erostarbe alkateak esan digunez, segurua oraindik lanean dabil kalteak zenbaterainokoak diren kalkulatzen.
Kobre lapurretak
Lapurreta hau baina, ez da egunotan Elgetan izan den bakarra: izan ere, Pagatza Industrialdean dagoen Iberdrolako etxola batean ere sartu dira lapurrak, eta kobrezko bobinak eroan dituzte.