14 herritar elkartu ziren herriko kultura etxean Elgeta 2020 parte-hartze proiektuko lehenengo lan bilera egiteko. Osasun publikoa, mugikortasuna, ibilgailuen zirkulazioa, herriko garapen soziala, herri bizitza eta harremanak eta herritarren parte hartzea izan zituzten aztergai.
Ondorioak
Lehentasun moduan agertu ziren osasun zerbitzua zabaltzea, batez ere pediatra zerbitzua. Ezinbestekotzat jo ziren elkarte eta herri mugimenduak laguntzea zein kalitatezko garraio publikoa ipintzea. Azkenik, adostu zuten garrantzitsua dela herri barruan autoen zirkulazioa murriztea.
Hurrengoa, azaroaren 18an
Hurrengo saioa hilaren 18an egingo dute, 19:00etan kultura etxeko liburutegian. Hizketa gai izango dituzte hirigintza (lurrak, etxebizitza, industrialdeak, aisialdi guneak, energia berriztagarriak, efizientzia energetikoa, ur sareak, gasa, ur zikinak, zaborrak eta birziklapena…), garapen ekonomikoa (enpresak, baserritarrak, dendak, ostatuak, zerbitzuak…), tokiko turismo iraunkorra nola bultzatu eta natura ondasuna. Herritar guztiak daude bertan parte hartzera gonbidatuak.