EAJ-EAk ordenantza fiskalen gainean udal gobernuak egindako proposamenaren aurka bozkatu zuen urriko osoko bilkuran. "Udalak onartutako bidegabekeria elgetarren aurrean salatu nahi dugu", adierazi dute.
Zaborraren zerga %16,1 igoko da Elgetan Udalak zerbitzu berezien bilketa herritarrek ordaintzea onartu baitu. "Salagarria da kontuan hartuta gainontzeko Udalek bere gain hartzen dituztela era horietako gastuak", esan du oposizioko taldeak.
Lehenengo aldiz zerga hori baserriei aplikatzea ere ez du begi onez ikusten EAJ-EAk. "Askotan berba goxoak erabili arren, baserritarren kalterako diren neurriak onartzen ditu Aralarrek".
Etxebizitza hutsei, zerga
Etxebizitza hutsei aplikatuko zaien zerga berriaren harira, Udal gobernua bere kaxa gauzak asmatzen ari dela salatu du oposizioak. "Oposizioan zegoenean hainbeste kritika egindako Aralar taldea da orain elgetarroi gure poltsikoak husteko agintzen diguna". Gaia konplexua dela adierazi dute, azterketa serioa eskatzen duena.