Zaborren zerga %16,1 igoko dute aurten Elgetan. Debagoieneko Mankomunitateak %13,9ko igoera aplikatuko dio zaborrak batzeko eskaintzen duen zerbitzuari. Kopuru horri, Udalak gaikako zabor-bilketaren gaineko zerga erantsi dio. Gainera, urtarriletik aurrera zaborren zerga baserriei ere aplikatuko zaie, orain arte ez bezala.
Aralar eta EAE-ANVren aldeko botoekin onartu zen proposamena urriaren 30eko plenoan. Elgetako Abertzaleak aurka bozkatu zuen. "Mankomunitatearen igoera nahikoa karga da aurten, gainetik beste zerga bat eransteko", esan zuen Iñaki Ugarteburu zinegotziak. "Eta baserriak gehiago grabatzeari arriskua ikusten diogu. Ez diogu sektoreari fabore handirik egingo".
Hamar euroko aldea
Oxel Erostarbe alkateak azaldu zuen filosofia kontua dela. "Zaborren tratamenduak kostu bat dauka eta herritarrak kontziente izan behar dute ". Neurri honekin Elgetaren ordenantza fiskalak Debagoienekoetara egokitzen direla esan zuen eta argitu zuen igoera hamar euro ingurukoa izango dela. "Herritarrok jasotzen dugun zerbitzua erakunde publikoak ordaindu beharrean herritarrok ordaintzea onartu dugu", azaldu zuen Erostarbek. Baserriei zerga aplikatzeari buruz esan zuen Debagoieneko herri guztietan egiten dela dagoeneko, Bergaran salbu.