Irualde Bat enpresa sustatzaileak Uruburuko etxebizitza tasatuen onuradunekin harremanetan jartzen hasia da salerosketaren eskriturak hilaren 18tik aurrera sinatu nahi dituela jakinarazteko.
Enpresa sustatzaileko arduradunak aste honetan bertan batu dira udaletxeko ordezkariekin gauzak zertan diren eta zein asmo dituzten finkatzeko.
"Beharginak buru belarri aritu dira lanean abuztuan etxebizitzak lehenbailehen amaitzeko", adierazi dute Irualde Bat enpresatik". Onuradunak, orain, etxebizitzen behin betiko prezioak ezagutzearen zain daude, izan ere hasiera batean emandako kopuruari KPIaren igoera aplikatuko diote, %7,6a hain zuzen ere. Iritsi da, beraz, 18 etxebizitza tasatuen onuradunendako banketxeekin negoziazioetan hasteko unea.
Udalaren baimena
Etxebizitzen salerosketaren eskriturak notario aurrean sinatu aurretik, ordea, enpresa sustatzaileak Elgetako Udalaren lehenengo erabilerako lizentzia behar du, beste batzuen artean. Uruburun 18 etxebizitza tasatu egin dira, guztiak garajearekin eta trastelekuarekin. Lehenengo salmenta kontratuak 2006ko azaroan sinatu ziren.