Uraren kontsumo arduratsua bultzatu nahi dute Udaletik eta Eskolatik

'Tantaka tantaka aurreztu ura' lelopean Elgetako I. Aste Berdea egingo dute Udalak eta Eskolak zapatuan hasi eta hilaren 27ra arte. Ekonomikoki gidatzeko ikastaroa egingo dute nagusiendako eta eskolako umeek eko-erreduktoreak banatuko dituzte herrian.

Eskola umeek luze eta zabal landu dute uraren gaia. Herriko eta eskolako iturrien ur kontsumoa neurtu dituzte, errekaren egoera aztertu dute, Aixolako urtegian eta Badiola araztegian ere izan dira... Zapatutik aurrera egingo den Elgetako I. Aste Berdean emango dute egindako lanaren berri. Pleno aretora eramango dituzte hilaren 22an egindako ikerketak. Ur kontsumoa murrizteko hainbat konpromiso hartzeko eskaera ere egingo diete udal batzarreko kideei.

Eko-erreduktoreak doan

Egun berean, goizetik, ur kontsumoa murrizteko eko-erreduktoreak banatuko dituzte  eskolako umeek herriko plazan. "Udal eraikin denetako txorrotetan eko-erreduktoreak ipiniko ditugu", agindu die dagoeneko Oxel Erostarbe alkateak. "Kalkulatzen dugu modu horretan ur kontsumoa erdira jaitsiko dugula".  Erostarbek gaineratu du Agenda 21eko ekintza plana eguneratzen hasiak direla udaletxean, eta herritarren iritziak kontuan hartzeko inkesta banatuko dutela laster etxez etxe.

Ekonomikoki gidatzeko ikastaroa

Zapatuan, hilak 17, modu ekonomikoan gidatzeko ikastaroak emango dio hasiera Elgetako I. Aste Berdeari. Lau orduko ikastaroa izango da eta arlo teorikoa zein praktikoa izango ditu. Real Automovil Club elkarteko kideek hainbat gomendio emango dituzte modu ekonomiko eta eraginkorrean gidatzeko. Parte hartzaileek aukera izango dute egunean bertan ikasitakoak kontua hartutako gidatuz gero kontsumoa zenbat jaisten den ikusteko. 10.00etan emango diote hasiera ikastaroari.

Egitaraua

* 17, zapatua

10:00etan, gidatzeko ikastaroa.

 

* 18, domeka

17:00etan, plazan, umeak urarekin ikertzen.

 

* 19, astelehena

10:00etan, plazan, 'Ura aurrezten' erakusketa.

 

* 20, martitzena

11:00etan, Salbador kalean, 'Ura Elgetan zehar' umeendako.

 

* 21, eguaztena

14:30ean, eskolan, konpostaje ikastaroa.

 

* 22, eguena

Goizean, plazan, eko-erreduktoreen banaketa.

 

14:30ean, udaletxean, Eskola Agenda 21 lanaren aurkezpena.

 

* 23, barikua

09:00etan, plazan, ur jolasak.

 

* 26, martitzena

19:00etan, udaletxean, hitzaldia. Iñaki Antiguedad.

 

* Ekainak 1, domeka

09:30ean, plazatik, irteera.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.