Sesto Azpi baserritik aurrera errekara doaz Elgetako ur zikinak.
Eusko Jaurlaritzaren eta Gipuzkoako Foru Aldundiaren nahia da ur zikin
horiek kanalizatzea eta kanalizazio hori San Juan errekan dagoen
sarearekin konektatzea. Proiektu horren lanak aprobetxatuz, Elgetara
gasa eta zuntz optikoa eramatea da Udalaren helburua.
Gaur egun Gas Natural enpresako hodiak Bergarako San Juan auzoraino
iristen dira eta ur zikinen kanalizazio lanak aprobetxatu nahi ditu Udalak gas hodiak eta Euskaltelen zuntz optikoa Elgetaraino eramateko. Elgetako
Udalaren proposamena da bi enpresa horiek herrian beraien zerbitzuak
eskaintzeko aukera izatea eta proiektuan parte hartzeko aukera izatea.
Baina helburu hori lortzeko bi oztopo aurkitu dituzte: batetik
proiektuaren finantziazioa eta bestetik Repsol Gasek herrian duen
monopolioa. Aurreko agintaldietan, Repsol Gasekin sinatutako hitzarmen
baten bidez, Elgetan hainbat lan egin ziren, horien artean gasa
etxeetara eramateko hoditeria sarea. Hoditeria hori baina, Udalarena
izan beharrean Repsol Gasena da, beraz, hoditeria berria beharko du
herriak.
Azkenaldian egindako lan guztietan Udalak bere hoditeria propioa sartu du, baina horiekin ez da aski herri osoa hornitzeko.