Udalbatzak aho batez onartu du Kutxari 185.586 euroko mailegua eskatzea: "Aurreko agintaldian aurreikusitako diru sarrera guztiak ez dira etorri eta gastuei aurre egiteko ez dugu beste irtenbiderik izan", esan du Erostarbe alkateak.
Muriasi 296.659 euro gehiago
Osokoan polemikoa izan zen gaia Muriasi onartutako aurrekontu igoera izan zen. Garestitu egin da Murias enpresa eraikitzailea Torrealdean egiten ari den obra, 296.659,18 euro hain zuzen ere. Proiektua esleitu zenean, 2004an, Udalak eta Muriasek 1.528.619,14 euroko prezioa adostu zuten. Aurreikusi gabeko gastuak sortu direla-eta prezioak eguneratu beharra exijitu du Muriasek. Hala, %19,41eko gehikuntza onartu dio Osokoak. Aralar eta Eusko Abertzale Ekintzaren babesarekin atera zen aurrera proposamena. EAJ-EA-k kontrako botoa eman zuen. "Maiatzean %10eko igoera eskatzen zuen Muriasek. Gehiegizkoa zen eta ez genien onartu", adierazi du EAJ-ko Joseba Muxikak. "Orain ia %20ko igoera eskatu du. Ziria sartu diote udal gobernuari eta litekeena da ordainketa horren zati bat egin beharko duen Iñurrategi enpresa eraikitzaileak Udala epaitegietara eramatea".
Erostarbek oso bestelako iritzia dauka: "EAJ-EAk ez zuen bere egunean arazoa konpondu eta guri etorri zaigu. Gauzak zeuden moduan egonda pentsatzen dugu Udalerako ahal zen akordiorik onena lortu dugula".