Udala erakusketa prestatzen ari da Emakumeen Nazioarteko Eguna dela-eta

Emakumearen Nazioarteko Eguna dela-eta argazki erakusketa zabalduko du Udalak Espaloian. Bertan, Elgetako 20 emakume agertuko dira lanean. Alizia Gartziak atera ditu argazki horiek guztiak. Erakusketa martxoaren 8an aurkeztuko dute.

Zergatik 20 emakume?
Gehiago agertzea nahi genuen, baina argazkien neurriak ez dira txikiak eta kalkulatu dugu aretoan 20 sartzen direla.  Aukeraketan sektore ezberdinak agertzearen aldeko apustua egin dugu. Askok merezi dute erakusketan agertzea, baina aukeraketa egin behar izan dugu.

Ze lanbide agertuko dira?
Askotarikoak. Udaletxean, laborategi batean, telebistan, baserrian, tailerretan, sukaldean, ile-apaindegian, eskolako jangelan, eguneko zentroan... lanean diharduten Elgetako emakumeak agertuko dira erakusketan.

Eta nola hartu dute  herriko emakume horiek erakusketa batean parte hartzeko proposamena?
Ondo. Hasierako erreakzioa beti da berdintsua: "Ni ez naiz argazkietan ondo ateratzen", "argazkiak ez dira nire gustukoak"... baina gero oso ondo hartu naute ni eta nire argazki-kamera.  Kolaboratzeko oso prest ikusi ditut guztiak.