Ibilbide luzea ez duen arren, herriko baserritarren produktuekin egiten den azoka dagoeneko finkatuta dagoen ekitaldia dela esan daiteke. Horixe adierazi zuten behintzat antolatzaileek, zapatuan izandako erantzunarekin gustura. Hamabi postu jarri dituzte aurten, eta bertan barazki, fruitu gazta eta halakoez gain, oiloak ere egon ziren salgai
Sagardo Eguna
Azoka goizean izan zen; arratsaldean baina, tortilla eta sagardoa izan ziren protagonistak Sagardo Eguneko ekitaldien barruan.
Tortilla lehiaketan 30 taldek parte hartu dute aurten, eta hiru sari banatu zituzten denera: itxurosoenarena, Piperrak taldearentzat izan zen. Gozoenaren saria, bi talderen artean banatu behar izan zuten: Azkoittiko Irabazleak eta Komando Tortilla. Arraroa dirudien arren, zapore txarrena zuen tortillaren egileak ere saritu zituzten: Tti-tti-ttak taldeak izan zuen ohore hori.
Behin lehiaketa amaitutakoan, tortilla bakoitzaren erdia pintxotan saldu zuten antolatzaileek.. Mokadutxoari laguntzeko gainera, herriko hainbat txokotan sagardo kupelak ere jarri zituzten.
Kontzertuak gaztetxean
Ekitaldiz jositako eguna izan zen zapatua, eta berau borobiltzeko, gaztetxean musika kontzertuak egon ziren gauean, The Perversions eta Los Seductores taldeen eskutik.