Lagun talde heterogeneoa ariko da kantuan: elkarrekin ariko dira euskaldunak eta gaztelaniaz abestu ohi dutenak; ibilbide luzekoak gehienak; Euskal Herrian egindako pop-rockaren historikoak, batzuk; eta azken belaunaldiko gazteak, besteak:
Gari, Mikel Agirre (La Buena Vida), Diego Vasallo, Estanis Elortza (Natural Project), Saioa, Amaia Intxausti, Rafa Berrio, Txuma Murugarren, Urko Menaia, Enrique Mingo, Santi Gasca (Sanchis y Jocanoren beste erdia), Giorgio Bassmatti, Jone Gabarain…
Elgetan egingo den zuzeneko lehen saioaren ondotik Azkoitikoa eta Donostiakoa etorriko dira.
Nor izan zen Serge Gainsbourg
Frantziako emakume ederrenetariko batzuk maiteminduarazi eta La Marseillaise-ren reggae bertsioa egin zuen kantu egile polemiko, ikonoklasta eta zirikatzailea izan zen. Pintorea, idazlea, argazkilaria, aktorea, zinema zuzendaria, askatasun sexualaren aitzindaria, erretzaile porrokatua, edale ase ezina eta belaunaldi oso baten erreferente estetikoa ere izan zen.
Frantziako musika irauli zuen, bere garaiari aurrea hartuz, sarri. Letra idazle handia ere izan zen, hitzen sonoritateari zukua atereaz.