Eguen Santuan, 18:00etan, Jesusen azken afariaren elizkizuna egingo dute; Egubakoitz Santuan, 09:00etan, gurutze bidea eliza barruan, eta 18:00etan Jesusen nekaldiaren ospakizuna; zapatuan, Pazko beila izango da 22:00etan; eta domekan, 12:00etan, ohiko meza.
Irudi pisutsuak
Prozesioa ere herri askotan ohikoa izaten da Aste Santuko eliza ospakizunetan. Aurten, ordea, ez da prozesiorik izango Elgetan.
Iaz, eguraldia txarra zela-eta, bertan behera utzi behar izan zuten prozesioa, aurten, berriz, ez egiteko erabakia aurrez hartu dute. Elizan esan digute irudiek pisu handia dutela, adinekoendako gehiegi dela, eta ez dagoela gazterik horiek eramaten lekukoa hartuko duenik. Hortaz, elizan ipiniko dituzte jendeak ikus ditzan, baina herriko kaleetara ez dituzte aterako.
Landetxeak beteta
Batzuek elizan eta besteek opor giroan, kanpora bidaiak eginez ospatuko dute Aste Santua.
Opor egunak aprobetxatuz Elgetatik kanpora joango denik bada, baina baita oporretan Elgetara etorriko denik ere. Izan ere, Elgetan turismorako egokitutako bi landetxeak Aste Santurako beteta daudela esan digute jabeek. Herrian, San Roke kalean, dagoen ostatuan ere Aste Santuan iaz baino jende gehiago izango dutela esan digute, hala ere, oraindik tokia badagoela. Turistak Madrildik eta Kataluniatik etorriko dira aurten eta guztiak dira bezero berriak, lehen aldiz Elgetako turismo etxeetara oporretan datozenak.