Hiru hitzorduk bat egingo dute domekan Herriko plazan. Goiztiarrenak, umeak izango dira, izan ere, perretxikoak batzeko irteera egingo dute 10:00etan abiatuta.
Perretxiko erakusketa
Hainbat herritar perretxikoak batzen aritu dira egunotan. Batutako ale ederrenak — onak eta txarrak— Herriko plazan ipiniko dituzte ikusgai 11:30etik 13:30era. Perretxiko bakoitza bere kartelarekin lagunduta joango da, ona, txarra edo hilkorra den ondo desberdintzeko. Mikologia eskola jasoko dugu.
Pintxo lehiaketa
13:30ak aldera, Pintxo lehiaketako sariak banatuko dituzte Herriko plazan. Elgetako zazpi tabernek hartuko dute lehiaketan parte, tartean Ostatu tabernako Arantza Aretxagak, iazko irabazlea. Epaimahaiko kideak tabernaz taberna ibiliko dira pintxoak puntuatzen. Epaimahaikoek emandako iritziaz gain, aurten herritarrek ere hitza izango dute lehiaketan. Tabernetan ipiniko duten fitxa batean botoa emateko aukera izango dute.
'Elgetaklik'
Lan gutxi jaso ditu Udalak lehenengo aldiz antolatu duen Elgetaklik argazki lehiaketan. Gaztelekuko gazteak, baina, animatu dira parte hartzera. Argazkiak ikusgai egongo dira domekan herriko tabernetan. Sari banaketa ere egingo dute.