Proiektua 15 egunez egongo da Gipuzkoako Aldizkari Ofizialean irakurgai eta lanak egiteko aurkezten diren enpresen artean bat aukeratu beharko du Udalak. Aurrekontuari dagokionez, BEZ barne, 282.942,05 euroko kopurua darabilte udaletxean.
Udaletxean ordezkaritza duten hiru taldeen aldeko botoekin onartu ziren haurreskolaren proiektua eta lanen baldintza plegua. Zerbitzu berria lehenbailehen martxan jartzeko premia ikusten dute denek ere.
Espazioa bi aretotan banatuta
Torrealdeko etxebizitza babestuetan aurreikusten du Udalak haurreskola berria egitea. Lokal handia da eta haurreskola ez ezik ludoteka eta gaztelekua ere bertan ipintzeko asmoa azaldu dute.
Haurreskolak bi gela, logela, aldagela eta patioa izango ditu. Ludoteka eta gaztelekua, berriz, beste aldean eta elkarren ondoan egongo dira. Gela erabiltanitza egokituko dute bertan, besteak beste.
Udalaren asmoa da lanak abendurako amaituta egotea eta Gabonetako oporrak tresneria guztia lekuz aldatzeko erabiltzea.
Herri Eskolan ere gela beharra dute. Gero eta ume gehiago dago eta, orain arte ez bezala, kinta bakoitzak berea behar du ume kopurua dela-eta. Haurreskolak gaur egun erabiltzen duen gela, beraz, ondo baino hobeto etorriko zaie libre gelditzen bada.