Martitzenean egindako plenoan Oñatiko hiltegirako kudeaketa egitasmo berriari lehenengo onespena eman dio osokoak. Egitasmoaren oinarria da hiltegiaren kudeaketa udalekotzea; hau da kudeaketa horretan parte hartzeko interesa duten udalen artean Zubillaga S.L. elkarte publikoa sortzea. “Pentsatzen dugu garrantzitsua dela Elgeta hor sartzea", esan du Oxel Erostarbe alkateak. "Zerbitzu hori edukitzea positiboa izango da herriarendako”.
Lehenengo onespena
Elgetako Udala ez da orain arte Zubillagako hiltegiko kudeaketa egituraren parte izan eta zerbitzuak izango dituen kostuak zein abantailak baloratzea tokatzen da orain. Baserritarren batzordeak datuak ditu mahai gainean. Azken 12 hilabeteotan Elgetatik 20 abelburu eraman dira Oñatiko hiltegira eta proposamena da Elgetak hasiera batean 5.000 euroko kapital ekarpena egitea eta urtero 2.400 euroko kuota ordaintzea.