Egoki kirol taldeak eta Elgetako Udalak gertu dute uztailera bitarteko programa. Lau irteera, ikastaro bat eta lasterketa bat antolatu dituzte datozen hilabeteetarako.
Lehenengo txangoa, martxoko bigarren aste bukaeran egingo dute, 8an eta 9an. Belagua inguruaz gozatzeko aukera plazaratu dute. Mendi ibilaldiak eta eski irteerak egin ahal izango dira. Prezioa 45 euro da. Joan-etorria, lo lekua, gosaria eta afaria sartzen dira prezio horretan. Materialaren alokairua, forfaita, bazkariak eta ikastaroak norberaren kontu dira. Izenematea zabalik dago Udaletxean hilaren 29ra arte.
Irteera adin guztietako lagunendako dago zabalik, baina 14 urtetik beherakoak arduradun batekin joan beharko dute.
Beste bost ekintza aukeran
Apirilaren 13an eskola arteko kros txapelketa egingo du Egokik eta Antzuolako eskola gonbidatuko dute horretarako.Maiatzean Bardeetara mendi bizikleta irteera egin gura dute.
Ekainaren 21ean, berriz, mendi irteera egingo dute Eguarbitzara eta asmoa da gaua bertan pasatzea. Uztailerako mendi irteera iragarri dute. Perdido mendira egingo dute txangoa 12an eta 13an. Patinaje ikastaroa antolatzeko asmoa ere agertu dute Egokiko kideek. Data zehazteko dago oraindik.