Badira aste batzuk entrenatzeko elkartzen direla. Astelehenetan eta eguaztenetan Elgetako industrialdean ikusi ohi ditugu lasterketa saioak egiten. "Hasiera batean Donostiako Lilaton egitea zen gure asmoa, baina Arrasaten Takarraran antolatu dutela ikusita erabaki dugu bertan parte hartzea", adierazi du Idoia Lasak. Lasterketa hori martxoaren 6an, zapatua, egingo dute. Hiru bat kilometroko ibilbidea du. "Elgetako emakumeak animatu nahi ditugu. Baten batek Takarraran lasterketan parte hartu nahiko balu gurekin etorri daiteke".
Ekitaldiak Elgetan ere
Elgetan, biharamunean, martxoaren 7an egingo dituzte Emakumearen egunarekin lotutako ekitaldiak. "Korrika moduko lasterketa bat antolatzen ari gara", esan du Alizia Gartziak. "Herriko hainbat eragilek ekitaldi horretan parte hartzea nahiko genuke; erretiratuen elkarteak, herri eskolak... Ideia da lekuko bat egin eta eskuz esku pasatzen joatea". Lasterkerta hori gizonezkoei ere zabalduko dute.
Pintxoak eta salda, dantzak... udal ongizate sailarekin batera egitaraua lantzen ari direla esan digute. Xehetasun gehiago datozen egunetan emango dituzte.