Gala barikuan, maiatzak 16
Aurreko bi edizioetan egin zuten moduan Mostrako lehenengo bi egunetan mago bakarreko ikuskizuna eta Magia Gala antolatu dituzte. Aurten, baina, ordena aldatu egin dute. Aurreko urteetan ez bezala barikuan, hilak 16, Magia Galak zabalduko du Mostra. Elgetan dagoeneko ezaguna den Morrison magoak egingo ditu aurkezle lanak. Galan, gainera, lau aktuazio ikusteko aukera egongo da. Bertan izango dira Andy Gonzalez madrildarra, Ilva Scali frantziarra eta Argentinatik Mirko eta Brando & Silvana bikotea. Diziplina oso ezberdinak jorratzen dituzte, beraz, denetarik ikusteko aukera egongo da Gala horretan. Barikuan, 22:30ean emango diote hasiera ikuskizunari.
Izarra, Migue magoa
Zapatuan, maiatzak 17, karta jokoak egiten maisua den Migue Magoa izango da Espaloian. 2007an munduko magorik onenaren saria eskuratu zuen Miguek karta jokoen diziplinan.
Domeka eguerdian, azkenik, kaleko magia egingo du Justo Thaus ilusionistak. Flikto izeneko ikuskizuna ekarriko du Elgetara, txikiendako eta nagusiendako erakargarria den muntaia. 12:45ean hasiko da funtzioa.