Azken hiru asteotan ezohiko itxura izan du udaletxeko osoko bilkuren aretoak. Hiru lagun gogor aritu dira lanean areto nagusiari itxura berria emateko. Elgetarrak hirurak, Bideberri mankomunitatearen Auzolan programaren barruan aritu dira lanean.
Ikastaroa egin zuten lehenengo; pintura eta lorezaintza ikastaroa, hain zuzen ere. Orain, praktikak egiten ari dira. Hiru asteotan udaletxeko areto nagusia konpondu eta margotu dute. Datozen egunotan Salbador kale osteko aparkalekuak eta garajeetarako sarrerak margotzen ikusiko ditugu, eta aurrerantzean herrian lorezaintza lanak ere egingo dituzte. Langabezian zeuden, eta Auzolan programaren bitartez sei hilabeteko lan kontratua egin zaie.
Uste baino denbora gehiago behar izan dute areto nagusia txukuntzeko. "Aretoa margotzea zen hasiera baten gure egitekoa, baina pintura kapa bat eman eta hurrengo egunean guztia altxatua zegoen horma pusketatan jausten zelako. Azkenean, igeltserotza lanak ere egin behar izan ditugu", esan digu langileetako batek. "Hori bai, aretoa oso dotore gelditu da, ederra aldea!".