Gero eta gehiago dira Elgeta inguruko lurretan ikus daitezken motorrak eta quadak. Modan dagoen kirola da eta gehienbat aste bukaeratan ugari izaten dira gora eta behera ibiltzen diren mota horretako ibilgailuak. Zenbait herritarrek kexa agertu dute udaletxean motor horiek lur publikoetan zein pribatuetan ibiltzen direlako eta dezenteko txikizioak eragiten dituztelako.
Udal arduradunak ere kezkatuta agertu dira arazo horren aurrean. Erakunde moduan Udala kontu horretan neurriak hartzeko eskumenik duen edo ez aztertzen ari da. "Aste bukaeran Intxortako puntan ikusi ditut motorrak", adierazi du Oxel Erostarbe alkateak. "Herri lurrak dira eta aztertu behar dugu arazoari nola aurre egin".
Lur jabeak kezkatuta
Lur pribatuetan ere sarri sartu eta ibili ohi dira motorrak eta quadak. Jabeek zoruan sortzen dituzten kalteak salatu dituzte eta euren lurretatik motorren joan-etorriak nola mugatu aztertzen ari dira. Kaltetuetako batzuk esku artean darabilten aukeretako bat da lur eremuen bueltan erromerak jartzea.