“Zorte handia izan dut”, zioen Jone Muxika elgetarrak zapatuan Quebrantahuesos proba amaitu bezain laster. “Ez nago nire sasoi punturik onenean, baina zortea lagun izan dut gaur. Behin zulatu dut eta hori helmuga gurutzatu ostean izan da”. Elgetarra izan da aurten Sabiñanigoko helmuga gurutzatzen lehenengo emakumea (06:29:09) eta zegokion saria jaso zuen Sabiñanigoko sari banaketan. Muxikak Elgetatik proban parte hartzera joandako txirrindulari eta lagunekin ospatu zuen saria 33 lagun batu ziren-eta Navasa herrian afaltzera.
12 elgetar bizikleta gainean
Huescako probak ospe handia du txirrindularien artean eta aurten 12 elgetar izan dira bizikleta gainean. Mutilen artean azkarrenak Oskar Askasibar (06:03:21) eta Xabier Aranguren (06:05:43) izan dira. Esan beharra dago irteera hartu duten elgetar guztiak iritsi direla helmugara. Gogorra izan da aurten proba. Bero handia egin du, eta zalantzarik gabe tenperatura altua izan dira aurten protagonista nagusia proba guztian zehar. Elgetako txirrindulariak animatzera joan direnak ere ez dira gutxi izan. Zorionak denei!
Denborak
- Oskar Askasibar 06:03:21
- Xabier Aranguren 06:05:43
- Jone Muxika 06:29:09
- Ibai Etxaniz 07:03:51
- Eñaut Arantzeta 07:16:30
- Alain Elorriaga 07:29:37
- Garikoitz Arrazola 07:38:50
- Jabier Larrañaga 08:29:41
- Joseba Muxika 08:52:24
- Etor Sarasua 09:23:26
- Unai Alkorta 09:57:11
- Iñaxio Askasibar 02:49:05 (Treparriscos proban)