Lehenengo denboraldia bukatu berri duzue. Zein balorazio egiten duzue? Kirol emaitzak onak izan dira?
Denboraldi hasieran finkatutako helburuak bete ditugu. Igoera txapelketarako sailkatzea zen erronka. Lortu egin dugu eta, zazpi taldetik, laugarren amaitu dugu txapelketa hori. Pozik gaude egindako lanarekin, bai.
Eta futbol taldeak sortu du jarraitzailerik Elgetan?
200 bazkide ditugu. Ez dago batere gaizki, kontuan hartuta Elgetan ez dela inoiz federatutako futbol talderik egon. Iruditzen zait, gainera, taldeak ilusioa piztu duela. Jendeak emaitzak jarraitu ditu. Kalean ere galderak egin dizkigu jendeak. Interesa agertu dute. Unbe futbol zelaira ere etorri dira gu ikustera. Ez gara kexu. Elgetarrek nahikoa laguntza eskaini digute.
Zer moduz moldatu zarete Unbeko futbol zelaian?
Elgetan, hobeto egongo ginateke, baina Unben aritu gara, eta gustura, gainera. Gertu dago, eta instalazio politak dira.
Denboraldi hasieran, arazo batzuk izan zenituzten entrenatzaileekin. Konpondu duzue kontu hori?
Hasieratik, Asier Castelos ibili da entrenatzaile lanetan. Laguntzaile bat eskatu zuen eta, azkenean, Bergarako David Acostak bete du lan hori.
Elgetako taldeak izango du jarraipenik hurrengo denboraldian?
Batzarra egingo dugu asteon hori erabakitzeko. Jarraituko dugula iruditzen zait niri; intentzioa, behintzat, badaukagu.
Lehenengo denboraldian, 22 jokalari aritu gara, 14 elgetakoak. Lauk esan dute dagoeneko utzi egingo dutela. Bergarako BTLS taldera doaz. Ikusteko dago gainerakoek zer asmo agertzen duten. Baina uste dut baietz, egingo dugula bigarren denboraldi bat.