Barikuan, hilak 12, ospatuko dugu Inauteria Elgetan. Eskolako umeak izango dira lehenak Inauteria kalera ateratzen. Eguraldi txarra espero dela-eta, aurten ez dute ohiko kalejira egingo. 15:00ak aldera eskolako 87 umeak udal pilotalekurantz abiatuko dira. Bertan asteotan hainbestetan entseatutako emanaldia egingo dute. "Ikuskizun zoragarria egingo dugu", adierazi du herri eskolako zuzendari Emma Igartuak. "Asko entseatu dugu eta primeran aterako zaigu". Euskal mitologiako pertsonaiak aukeratu dituzte mozorroak prestatzeko. Ez dakigu besterik.
Amaitutakoan eta guraso elkartearen eskutik txokolate-jana egongo da. Jarraian, udalak antolatutako jokoak eta pailazo emanaldia egongo da. Pantxika eta Txinparta pailazoek Ederra zalaparta izeneko emanaldia egingo dute Espaloian.
Gaua, gaztetxean
Gaztetxekoek, berriz, herri afaria eta ska kontzertua antolatu dituzte. Azpeitiko Egurra ta kitto! taldea eta Kataluniako Mimmisikous Band izango dira gaztetxean 23:00etan hasita. Aurretik, afaltzeko elkartuko dira. Menuan patatak errioxar erara, hanburgesak tomate saltsan, postrea, kafea, ogia eta edaria 9 euroko prezioan. Haizean eman daiteke izena eguenera arte, hilak 11.